Angelsachsen

E Rekonstrukzioon vom ene Helm vom ene Fürst (vermuetlig vom Köönig Rædwald) us Sutton Hoo (British Museum). Dr Helm basiert zwar uf em Spangehelm, äänelet aber de Helm us dr Vendelzit in Schweede.

D Angelsaggse si e germaanischs Sammelvolk gsi, wo vom 5. Joorhundert aa Groossbritannie besiidlet und no di noo beherrscht het.^[1] Vo dr Middi vom 6. Joorhundert aa isch die angelsäggsischi Kultuur uf dr Insle scho dominant gsi, wil die röömisch-keltischi Bevölkerig äntwääder verdrängt oder assimiliert worde isch.^[2] As angelsäggsischi Perioode wird in dr britische Gschicht d Zit vo öbbe 450 bis 1066 aagluegt, wo schliesslig d Normanne s Land erooberet häi.^[1]

S Sammelvolk vo de Angelsaggse het hauptsächlig us Saggse und Angle bestande. Die Stämm, zämme mit Grubbe vo Jüte, Friese und Niiderfranke dräte ab em 5. Joorhundert uf. Zur Ethnogeneese vo de Angelsaggse isch s choo, wo si noch iirer Iiwanderig vo Däil vo dr existierende keltisch-romaanische Bevölkerig vo Britannie ufgnoo worde si.

Us däm Völkerverband het sich en angelsäggsischi Kultuur uusebildet. Spööter, wo Skandinaawier, Dääne und im 11. Joorhundert frankofooni Normanne drzue choo si, het sich im Lauf vo dr Zit im Hoochmiddelalter e kulturell-ethnischi Konstellazioon bildet, wo spööter as änglischi Nazioon und Kultuur interpretiert worde si. S Angelsäggsische het sini wääsentlige sproochlige Wurzle in dr altsäggsische Sprooch und drotz ere underschiidlige Entwicklig wääred 1500 Joor git s immer no e Huffe Gmäinsaamkäite zwüsche dr änglische und dr niidersäggsische Sprooch.

Dr Begriff Angelsaggse wird vilmol im überdräute Sinn in Bezuug uf d Bewooner vo de Britische Insle und uf die änglischsproochige Völker in Nordamerika und Ozeaanie (US-Amerikaner, Kanadier, Australier, Nöiseeländer) brucht.^[3] Vor allem in de USA isch dr Terminus in dr jüngste Zit mee und mee umstritte, wil er dört tum Däil mit dr White Supremacy assoziiert wird.

↑ ^1,0 ^1,1 Nicholas J. Higham, Martin J. Ryan: The Anglo-Saxon World, Yale University Press, 2013.
↑ Mark G. Thomas, Michael PH Stumpf, Heinrich Härke: Evidence for an apartheid-like social structure in early Anglo-Saxon England. In: Proceedings of the Royal Society B: Biological Sciences 273.1601 (2006): 2651–2657.
↑ z. B.White Anglo-Saxon Protestant abkürzt WASP.

[Higham2013-1] 1,0 ^1,1 Nicholas J. Higham, Martin J. Ryan: The Anglo-Saxon World, Yale University Press, 2013.

[Thomas2006-2] Mark G. Thomas, Michael PH Stumpf, Heinrich Härke: Evidence for an apartheid-like social structure in early Anglo-Saxon England. In: Proceedings of the Royal Society B: Biological Sciences 273.1601 (2006): 2651–2657.

[3] z. B.White Anglo-Saxon Protestant abkürzt WASP.

[1]

[2]

[3]